«СҚ-Фармация» ЖШС басқарма төрағасы Нұрлыбек Асылбековтің Қытай Халық Республикасына жұмыс сапары Бейжің қаласында әлемдегі жетекші фармацевтикалық компаниялар – AstraZeneca China, Sinopharm және Sinovac өкілдерімен кездесулермен жалғасты. Кездесулер барысында тікелей жеткізілімдер, өндірісті оқшауландыру, технологиялар трансфері және бірлескен инвестициялық жобаларды дамыту перспективалары талқыланды.
17 маусым күні AstraZeneca China компаниясының басшылығымен келіссөздер өтті. Тараптар компанияның Қытай нарығындағы жұмыс тәжірибесін, сатып алу рәсімдерін ұйымдастыру тәсілдерін, дәрілік заттармен қамтамасыз ету жүйесін, сондай-ақ қолданыстағы баға белгілеу тетіктері мен баға саясатын талқылады.
Кездесу барысында AstraZeneca Орталық Азия елдерімен ынтымақтастықты дамыту жөніндегі ұстанымдарын таныстырып, дәрілік қамтамасыз ету саласындағы қажетті құзыреттері мен инфрақұрылымы бар өңірдегі негізгі серіктес ретінде «СҚ-Фармациямен» өзара іс-қимыл жасауға мүдделілік білдірді.
Тараптар инновациялық дәрілік заттарды жеткізу бойынша тікелей келісімшарттарды дамыту, жекелеген препараттардың өндірісін Қазақстанда оқшауландыру, технологиялар мен өндірістік құзыреттер трансфері, инвестициялық жобаларға қатысу, биофармацевтика мен вакциналар өндірісін дамыту, сондай-ақ халықтың заманауи дәрілік препараттарға қолжетімділігін кеңейту сияқты ынтымақтастықтың перспективалы бағыттарын қарастырды.
Сонымен қатар, «СҚ-Фармация» мен AstraZeneca Kazakhstan арасындағы ынтымақтастықтың нақты нәтижелері бар екені ерекше атап өтілді. Атап айтқанда, AstraZeneca компаниясы қазақстандық өндіруші – «Нобел Алматы фармацевтикалық фабрикасы» ЖШС базасында созылмалы жүрек жеткіліксіздігі мен созылмалы бүйрек ауруы бар пациенттерді емдеуге арналған «Дапаглифлозин» препаратын өндіруді оқшауландырды. Бірыңғай дистрибьютормен жасалған ұзақ мерзімді шарт шеңберінде препарат 2026 жылы пациенттерге жеткізілді. Бұл жобаның табысты іске асырылуы өндірісті оқшауландыру және халықты инновациялық дәрілік заттармен қамтамасыз ету саласындағы ынтымақтастықты одан әрі дамыту әлеуетін растайды.
«Қазақстанның фармацевтика саласын дамыту және халықаралық инвестициялар тарту үшін әлеуеті зор. Біздің міндетіміз – әлемнің жетекші өндірушілерімен ұзақ мерзімді әріптестік орнату, халықтың заманауи әрі сапалы дәрілік заттарға қолжетімділігін кеңейту, сондай-ақ өндірісті оқшауландыру мен технологиялар трансфері үшін жағдай жасау. Бүгінде келісімшарттық өндіріс шеңберінде «СҚ-Фармация» Pfizer (АҚШ), Hoffmann-La Roche (Швейцария) және AstraZeneca AB (Швеция) компанияларымен алты түпнұсқалық патенттелген препаратты жеткізу бойынша ұзақ мерзімді шарттар жасасты. Бұл халықаралық компаниялардың Қазақстанға деген сенімін және отандық фармацевтика өнеркәсібін дамытуға бағытталған саясаттың тиімділігін айқын көрсетеді», – деді «СҚ-Фармация» ЖШС басқарма төрағасы Нұрлыбек Асылбеков.
Сондай-ақ Sinopharm мемлекеттік корпорациясының өкілдерімен кездесу өтті. Келіссөздер барысында медициналық жабдықтарды жеткізу және сервистік қызмет көрсету, шығыс материалдарымен қамтамасыз ету, сондай-ақ Қазақстандағы сатып алу рәсімдерін ұйымдастыру ерекшеліктері талқыланды. Тараптар, оның ішінде Sinopharm компаниясының медициналық техниканы сервистік сүйемелдеуін ұйымдастыру мәселелері бойынша ақпарат алмасуға келісті.
Нұрлыбек Асылбеков Қытай тарабына сатып алуды ұйымдастыру жүйесін, жабдықты сервистік сүйемелдеуге қойылатын талаптарды, оның ішінде іске қосу-баптау жұмыстарын, персоналды оқытуды және техникалық қызмет көрсетуді егжей-тегжейлі таныстырды. Sinopharm өкілдеріне Қазақстан Республикасының қолданыстағы заңнамасы, дәрілік заттар мен медициналық бұйымдарды тіркеу мәселелері, сондай-ақ өндірісті оқшауландыру мүмкіндіктері бойынша түсіндірмелер берілді.
Қазақстан үшін Sinopharm дәрілік заттар мен медициналық бұйымдар өндірісін оқшауландыру, бірлескен өндірістер құру, логистикалық инфрақұрылымды қалыптастыру және денсаулық сақтау саласындағы жобаларды іске асыру бойынша әлеуетті стратегиялық серіктес ретінде қызығушылық тудырады.
ҚХР мемлекеттік корпорациясы мәртебесін, қызмет ауқымын және елеулі халықаралық тәжірибесін ескере отырып, Sinopharm Қазақстанның фармацевтикалық және медициналық өнеркәсібін дамытудағы негізгі әлеуетті инвесторлар мен технологиялық серіктестердің бірі ретінде қарастырылуы мүмкін.
Келіссөздердің жеке блогы Sinovac биофармацевтикалық компаниясымен ынтымақтастыққа арналды. Компания өкілдері өз қызметі туралы ақпарат беріп, қазіргі таңда Sinovac вакциналардың оннан астам түрін өндіретінін, өнімдерін әлемнің 80-нен астам еліне экспорттайтынын және халықаралық сапа сертификаттарына ие екенін атап өтті. Компанияның вакциналары ДДҰ-ның преквалификациясынан өткен. Сонымен қатар компания Түркия, Бразилия және Чилиді қоса алғанда, бірқатар мемлекеттерде өндірісті оқшауландырған.
Sinovac өкілдері Қазақстанмен ынтымақтастықты, оның ішінде клиникалық зерттеулер мен вакциналарды сынақтан өткізу бағыттарын дамытуға қызығушылық білдірді.
Кездесу барысында еліміздің аумағында вакциналар мен басқа да иммунобиологиялық препараттар өндірісін оқшауландыру перспективалары талқыланды. Ерекше назар халықты полиомиелитке қарсы вакцинамен қамтамасыз ету мәселелеріне аударылды. Бірыңғай дистрибьютор өкілдері Sinovac компаниясының полиомиелитке қарсы вакциналар бойынша әлемдегі ең ірі ғылыми-зерттеу және дәлелді базалардың біріне, сондай-ақ оларды өндіруде мол тәжірибеге ие екенін хабарлады. Қазіргі уақытта компания жыл сайын 100 миллионнан астам доза полиомиелитке қарсы вакцина өндіреді.
Сонымен қатар тараптар Орталық Азия елдері үшін вакциналар мен басқа да иммунобиологиялық препараттарды топтық сатып алу тетіктерін дамыту мәселелері бойынша пікір алмасты және ықтимал ынтымақтастық форматтарын одан әрі пысықтауға дайын екендіктерін білдірді.
«СҚ-Фармация» үшін әлемнің жетекші өндірушілерімен тікелей өзара іс-қимылды дамыту аса маңызды. Бұл елдің дәрілік қауіпсіздігін нығайтып қана қоймай, өндірістерді оқшауландыру, технологиялар трансфері және отандық фармацевтика саласына инвестициялар тарту үшін алғышарттар қалыптастырады. Түптеп келгенде, бұл заманауи препараттардың қолжетімділігін арттыруға және Қазақстанның денсаулық сақтау жүйесін нығайтуға ықпал етеді», – деп атап өтті Бірыңғай дистрибьютордың басшысы.
Сондай-ақ Қытайдағы медициналық өнімдердің ірі өндірушілерінің бірі – Weigao корпорациясының өкілдерімен кездесу ұйымдастырылды. 1988 жылы құрылған компания ҚХР-дың 500 ірі кәсіпорнының қатарына кіреді, өндірістік алаңдарының көлемі 6 млн шаршы метрден асады, 30 мыңнан астам қызметкерді біріктіреді және 200 мыңнан астам спецификацияны қамтитын 1 мыңнан астам медициналық өнім түрін шығарады. Компания өнімдері АҚШ, Еуропа елдері, Оңтүстік Африка, Бразилия және Оңтүстік-Шығыс Азия мемлекеттерін қоса алғанда, әлемнің ондаған еліне жеткізіледі.
Келіссөздер барысында Нұрлыбек Асылбеков Weigao өкілдерін Қазақстанда қолданыстағы нормативтік-құқықтық актілермен таныстырып, дәрілік заттар мен медициналық бұйымдарды тіркеу бөлігіндегі заңнама талаптарын түсіндірді. Өндірісті оқшауландыру және Қазақстан Республикасының аумағында бірлескен жобаларды іске асыру мүмкіндіктеріне ерекше назар аударылды. Халықаралық тәжірибесі мен қызмет ауқымын ескере отырып, Weigao корпорациясы медициналық бұйымдар өндірісі, медициналық инфрақұрылымды дамыту және денсаулық сақтау жүйесіне заманауи кешенді шешімдерді енгізу саласында Қазақстан үшін әлеуетті технологиялық серіктес ретінде қызығушылық тудырады.
Кездесулер қорытындысы бойынша «СҚ-Фармация» ЖШС басқарма төрағасы медициналық бұйымдар саласындағы Қазақстан Республикасының бейінді қауымдастықтарымен өзара іс-қимыл орнатуға жәрдем көрсетуге, сондай-ақ дәрілік заттар мен медициналық бұйымдардың айналымын реттейтін қолданыстағы нормативтік-құқықтық база туралы ақпарат ұсынуға дайын екенін растады.
.jpeg)