ДӘРІЛІК ТЕРАПИЯНЫҢ САПАСЫ МЕН ҚАУІПСІЗДІГІ: ӘЛЕМДІК ТРЕНДТЕР МЕН СТАНДАРТТАР

Бүгін Астанада ҚР Президенті Іс Басқармасының, ҚР Денсаулық сақтау министрлігінің және «Клиникалық фармакологтар мен фармацевтердің кәсіби қауымдастығы» РҚБ қолдауымен гибридті (офлайн және онлайн) форматта «Дәрілік терапияның сапасы мен қауіпсіздігі: әлемдік трендтер мен стандарттар» Қазақстан терапевттерінің конгресі басталды.

Конгреске терапевтік бейіндегі мамандар, мемлекеттік органдар мен ДДСҰ өкілдері, саланың жетекші отандық және шетелдік медицина сарапшылары, оның ішінде Бірыңғай дистрибьютор басшысы Ерхат Искалиев қатысты.

Мақсаты – медициналық қоғамдастықтың ғылыми жетістіктерін, клиникалық тәжірибесі мен білімін біріктіру, дәрілік терапияның соңғы ғылыми-клиникалық жетістіктерін және онымен байланысты тәуекелдерді пайдалана отырып, терапевтік қызметтің өзекті практикалық тәжірибесімен бөлісу.

Іс-шараны өткізу форматы қауіпсіз фармакотерапия мәселелерін, оның ішінде дәрілік заттарды дұрыс тағайындамау және полипрагмазия мәселелерін сараптамалық талқылауға арналған диалог алаңын көздейді.

Бірінші кезекте «Дәлелді медицина және клиникалық тәжірибе синтезіне негізделген жеке және профилактикалық дәрілік терапия» пленарлық сессиясы өтті, онда заманауи дәрілік терапияның өзекті мәселелері бойынша жетекші отандық және шетелдік мамандардың баяндамалары айтылды. Спикерлер өздерінің сараптамалық пікірлерін ұсынды, ішкі аурулардың дәрілік терапиясы саласындағы тәжірибелерімен және білімдерімен бөлісті.

Қатысушылар дәрілік терапияның қауіпсіздігін және оларды арттыру жолдарын, препараттарды қауіпсіз қолдану принциптерін, респираторлық медицинадағы дәрілік терапияның заманауи парадигмаларын, полиморбидтілік пен полипрагмазия тәуекелдерін, аутоиммунды аурулары бар коморбидті науқастарды емдеудегі дәрілік терапияның қауіпсіздік аспектілерін және басқа да бірқатар өзекті мәселелерді талқылады.

Антибиотикке төзімділіктің өсіп келе жатқан проблемасына байланысты бактерияға қарсы препараттарды ұтымды қолдану мәселесі белсенді талқыланды. Антибиотиктер жиі дұрыс қолданылмайтындықтан, бұл халықтың денсаулығына үлкен зиян келтіреді және әлемнің барлық елдерінде бұл тағы бір өзекті мәселе.

Дәрілік қауіпсіздік – бүкіл әлемде маңызды және өзекті мәселе. Қазақстанда Халық денсаулығы, қауіпсіздік, сондай-ақ дәрілік заттардың сапасы мен тиімділігі мәселелеріне ерекше назар аударылып, ұлттық қауіпсіздікті қамтамасыз ету факторларына жатқызылды. Медициналық препараттардың айналымы мәселелері «Халық денсаулығы және денсаулық сақтау жүйесі туралы» ҚР Кодексімен реттеледі.

Бірыңғай дистрибьютор үшін дәрі-дәрмектерді сатып алу және бөлу кезінде фармацевтикалық препараттардың сапасы мен қауіпсіздігі өте маңызды. Дәрі-дәрмектердің айналымын мемлекеттік қадағалаудың кешенді және көп сатылы жүйесі Қазақстан халқын қауіпсіз, тиімді және сапалы дәрілік заттармен қамтамасыз етуге ықпал етеді.

Сонымен қатар, Қазақстанда тіркелген дәрілік заттардың қауіпсіздігі туралы ақпаратты бақылау, талдау және бағалау жүйесі енгізілді. Пациенттер дәрілік заттардың жанама әсерлерін немесе олардың ауруды емдеудегі тиімсіздігін анықтаған кезде, Сараптама орталығының сайтындағы сары хабарлама картасын толтыру үшін емдеуші дәрігерге жүгінуі керек.

Барлық келіп түскен карталар мұқият талдауға жатады. Елеулі жағымсыз реакцияны тудырған барлық факторларға тексеру жүргізіледі, дәрілік заттардың үлгілері алынады және зертханалық сынақтар жүргізіледі.

«Сары карталар» тәжірибесі ең алдымен пациенттердің қауіпсіздігін қамтамасыз етуге арналған. Дәл осы кері байланыс құралдары пациентке бағытталған денсаулық сақтау жүйесінің қалыптасуына ықпал етеді.

Бірыңғай дистрибьютор «сары карточкалар» сияқты кері байланыс құралдарын пайдалана отырып, өнім берушілерге қойылатын талаптарды арттыру жолымен қазақстандық медициналық мекемелер қамтамасыз ететін дәрі-дәрмектердің сапасы мен қауіпсіздігі мәселелерін басымдыққа қояды.

Қазақстан терапевттерінің конгресі саланың ағымдағы сын-тегеуріндерін және оларды шешу жолдарын талқылау үшін, осы саланың сарапшылары арасында тәжірибе және ақпарат алмасу жолымен бірегей алаңға айналды. Нәтижесінде Конгресс қарарында көрініс табатын ұсыныстар жасалды.

Конгресстің екінші күні ауруханалық фармация мәселелеріне арналатынын атап өткен жөн. Дәрігерлер, провизорлар мен медбикелер үшін мастер-класстар өткізу көзделген. Сонымен қатар, денсаулық сақтау министрлігі мен республиканың ғылыми мекемелері өкілдерінің қатысуымен дөңгелек үстел өтеді, онда мамандар Қазақстанның медициналық мекемелеріне госпитальдық фармация жүйесін ұйымдастыру және енгізу мәселелерін талқылайтын болады.

Анықтама:

«Сары карта» - бұл дәрілік заттың жанама әсері туралы, дәрілік затты медициналық қолдану кезіндегі жанама әсерлердің анықталған жағдайлары туралы хабарлама және дәрілік затты қабылдаудың себеп-салдарлық байланысының дәрежесін және оның жанама әсерін шамамен анықтауға мүмкіндік беретін мәселелер тізбесін қамтиды. Сары карта әдісі – бұл препараттың жағымсыз әсеріне күдік туралы аймақтық немесе ұлттық ескерту жүйесі және фармакологиялық бақылаудың (ДДСҰ) негізгі әдісі болып табылады.

ҚР Президентінің Іс Басқармасы – Мемлекет Басшысына тікелей бағынатын мемлекеттік орган. ҚР ПІБ Қазақстан Республикасы Президентінің, Президент Әкімшілігінің, Үкіметінің және Парламентінің қызметін қолдауды қамтамасыз етеді.