Қазақстан Республикасы Парламенті Мәжілісінің депутаты, Әлеуметтік-мәдени даму комитетінің төрағасы Асхат Аймағамбетов «СҚ-Фармация» ЖШС-де болды. Мәжіліс депутатының қатысуымен ұйымның жұмыс процестерімен егжей-тегжейлі танысып, ел азаматтарын дәрілік заттармен қамтамасыз етудің өзекті мәселелеріне арналған кеңес өтті.
Іс-шараға ҚР Денсаулық сақтау министрлігі, Республикалық электрондық денсаулық сақтау орталығы, Медициналық және фармацевтикалық бақылау комитеті, СҚ-Фармация және Дәрілік заттар мен медициналық бұйымдарды сараптау Ұлттық орталығының негізгі ведомстволарының өкілдері қатысты.
Кеңесті Денсаулық сақтау вице-министрі Ержан Нұрлыбаев ашты. Ол өзінің кіріспе сөзінде кездесудің мақсаттары мен міндеттерін белгілеп, іс-шараның күн тәртібіне тоқталып өтті. Талқылаудың негізгі тақырыбы – Бірыңғай дистрибьютордың қызметін трансформациялау болды.
Талқылау барысында қатысушылар амбулаториялық деңгейде дәрі-дәрмекпен қамтамасыз етуді жоспарлау процестерін цифрландыру, баға белгілеу тетіктерін жетілдіру, логистиканы оңтайландыру, дәрі-дәрмектердің ашықтығын, қолжетімділігі мен сапасын арттыру мәселелеріне назар аударды.
«СҚ-Фармация» ЖШС-нің Басқарма төрағасы Еркен Жақатай компанияның ағымдағы қызметі туралы баяндама жасап, Бірыңғай дистрибьютордың жұмысын жаңғырту бойынша нақты шараларды ұсынды.
«Бүгінгі таңда СҚ-Фармация жоспарлаудан бастап сатып алуға дейінгі сатып алу рәсімдерін толық автоматтандыруға, сондай-ақ елдің денсаулық сақтау экожүйесіне одан әрі интеграциялана отырып, бірыңғай ақпараттық база құруға бағытталған. Бұл Қазақстан Республикасының Денсаулық сақтау саласындағы сатып алуды басқарудың ашықтығы мен тиімділігінің жоғары деңгейін қамтамасыз етеді. Бірыңғай дистрибьютор ұжымы логистика саласын жақсарту бойынша үлкен жұмыс атқарды, сондай-ақ алдағы 2025 жылға арналған дәрілік препараттар мен медициналық бұйымдарды күнделікті негізде сатып алу процесі жүзеге асырылуда. Бұл шаралар азаматтарымызды өмірлік маңызды дәрі-дәрмектермен үздіксіз қамтамасыз ету үшін қажет», - деп атап өтті Е. Жақатай.
Республикалық электрондық денсаулық сақтау орталығы бас директорының бірінші орынбасары Бейбіт Есенбаев дәрілік заттарды жоспарлаудың автоматтандырылған процестерін енгізу және дәрі-дәрмектерді тұтынуды басқаруды жақсарту үшін цифрландыру әлеуеті туралы айтып берді.
Кеңес соңында Асхат Аймағамбетов: «Жұмыс жүйелі және дәйекті түрде жүргізіліп жатқаны байқалады. Дәрілік заттар мен медициналық өнімдердің логистикасында айтарлықтай жақсартулар байқалады. Біздің мақсатымыз – Қазақстан халқының денсаулығын сақтау және жақсарту, сондықтан процестерді тұрақты негізде бақылау және жетілдіру қажет».
Ол сондай-ақ жеткізілімдерді бақылауды нығайтуға және халықтың өмірлік маңызды препараттарға уақтылы қол жеткізуін қамтамасыз етуге бағытталған кешенді шешімдер қабылдау қажеттігін атап өтіп, дәрілік қамтамасыз ету жүйесін одан әрі жаңғырту, оның ішінде процестерді цифрландыру және баға белгілеу тетіктерін жетілдіру Қазақстанның әрбір тұрғыны үшін сапалы дәрі-дәрмектердің қолжетімділігінің кепілі болатынына сенім білдірді.
.jpeg)
