Бүгін Бірыңғай дистрибьютор алаңында Египеттің «EIPICO» (Egyptian International Pharmaceutical Industries Company) компаниясының өкілдерімен кездесу өтті,
EIPICO – Египеттің фармацевтикалық өндірушісі. Компания 25 терапевтік топ бойынша 276 дәрі-дәрмек шығарады. Египеттің фармацевтикалық экспортының көшбасшысы (Египеттің фармацевтикалық өнімдерінің жалпы экспортының 21%-ы).
Жергілікті өндіріс үлесін ұлғайту және шетелдік өндірушілермен ынтымақтастықты күшейту жөніндегі Мемлекет басшысының тапсырмасын орындау мақсатында Бірыңғай дистрибьютор Қазақстан нарығына әлемдік брендтерді тарту мәселелерін белсенді пысықтауда.
Әңгімелесу барысында тараптар денсаулық сақтау саласындағы ынтымақтастықтың перспективалық бағыттарын қарастырды. Египет фармкомпаниясы Қазақстанда жақын маңдағы елдерге әлеуетті экспортпен өндіріс құру мүмкіндігін қарастыруда.
Атап айтқанда, компания Қазақстанның ғана емес, көрші елдердің де фармацевтикалық нарығына бағдарланатын дәрілік заттарды өндіру жөніндегі жобаны іске асыруға мүдделі.
Перспективалық ынтымақтастық шеңберінде EIPICO әртүрлі дистрибьюторлармен, мемлекеттік және үкіметтік емес, соның ішінде Бірыңғай дистрибьютормен келісімшарттар жасау мүмкіндігін қарастырады.
Айта кету керек, өткен жылы осы жобаны іске асыру мүмкіндігін талқылау бойынша әлеуетті жергілікті серіктестермен бірқатар кездесулер мен келіссөздер өткізілді.
Бірыңғай дистрибьютор өз тарапынан еліміздің фармацевтикалық секторын және тұтастай алғанда денсаулық сақтау саласын жақсартуда және дамытуда туындайтын мәселелер бойынша ынтымақтастық пен үйлестіруге ашық.
Соңында тараптар сындарлы диалог үшін бір-біріне алғыстарын айтып, мәселелерді одан әрі пысықтау үшін зум-кеңесін өткізуді жоспарлай отырып, жемісті және тығыз ынтымақтастыққа дайын екендіктерін білдірді.
Екіжақты әріптестік денсаулық сақтау саласында шығарылатын өнімдер мен көрсетілетін қызметтердің сапасын арттыруға, сондай-ақ отандық медицина өнеркәсібін дамытуға серпін береді.
Анықтамалық:
«EIPICO» компаниясы 1980 жылы құрылып, 1985 жылы Египетте, Таяу Шығыста және Солтүстік Африкада фармацевтикалық өнімдер шығаратын жетекші компания ретінде өндірісті бастады. Сауд Арабиясында 1 зауыты бар.
«EIPICO»- да Египеттегі алғашқы Биотехнология және гендік инженерия ғылыми орталығы бар. Компания 400-ден астам дәрілік зат шығарады, олардың 65-і лицензия бойынша шығарылады. «EIPICO» – Египеттегі ең ірі жалпы өндіруші. Компания 25 терапевтік топ бойынша жылына 170 млн. АҚШ долларды құрайтын 276 дженерик өнім өндіреді.
