5 қазанда Бірыңғай дистрибьютор алаңында Францияның даму агенттігінің (AFD) денсаулық сақтау саласындағы сарапшылар делегациясымен кездесу өтті.
Француз делегациясының құрамында AFD Денсаулық сақтау және әлеуметтік қорғау департаментінің денсаулық сақтау жөніндегі жетекші сарапшылары, Орталық Азия елдері үшін AFD кеңсесінің директоры және жобалық менеджері, «Expertise France» халықаралық сарапшысы және Францияның Қазақстандағы Елшілігінің Экономикалық бөлімінің жобалар жөніндегі аға маманы болды.
Екіжақты кездесу барысында тараптар өзара тиімді стратегиялық әріптестік мәселелерін, фармацевтика саласында бірлескен жобаларды іске асыру мүмкіндіктерін, сондай-ақ Қазақстанның экономикалық әлеуетін талқылады.
Француз даму агенттігінің қызметі халықтың өмір сүру жағдайын жақсартатын және экономикалық өсуге, оның ішінде денсаулық сақтау және дәрілік заттар айналымы саласындағы жобаларды қолдауға бағытталған.
AFD тарапынан денсаулық сақтау және әлеуметтік қорғау жүйесін нығайтуды қолдауы әсіресе COVID-19 дағдарысынан кейін байқалды. 2021 жылы олар бұл секторларға 826 миллион еуро көлемінде қаржы бөлді. Бюджет бүкіл әлем бойынша 64 жобаға бөлінді, олар 52 миллионнан астам адамға медициналық көмекке қол жетімділікті қамтамасыз етіп, ал 24 миллион адам әлеуметтік қорғауды жақсартты.
Қазақстанмен ынтымақтастыққа келетін болсақ, 2021 жылдың мамыр айында AFD Ұлттық экономика министрлігімен республикада қызметін бастау туралы өзара түсіністік туралы меморандумға қол қойды. Сонымен қатар, ҚР Денсаулық сақтау министрі бастаған қазақстандық делегацияның Францияға жұмыс сапары барысында екі ел арасындағы денсаулық сақтау саласындағы Үкіметаралық келісім жобасы, денсаулық сақтау саласындағы Қазақстан-Француз ынтымақтастығының келешегі талқыланды.
Келіссөздер қорытындысы бойынша ұлттық денсаулық сақтау жүйесіне инвестициялар тартуды, дәрі-дәрмектер мен медициналық мақсаттағы бұйымдар өндірісін жергіліктендіруді, зертханалық қызметті жаңғыртуды, телемедицина мен цифрлық денсаулық сақтауды, сондай-ақ Алматыда заманауи клиника салуды қоса алғанда, денсаулық сақтау саласындағы ынтымақтастықты жандандыру туралы уағдаластыққа қол жеткізілді.
Сонымен қатар, AFD Қазақстанның Денсаулық сақтау министрлігінде «Expertise France» қызметкерінің тұрақты қатысуының қолдауымен осы саладағы екіжақты диалогтың жандануын ескере отырып, денсаулық сақтау және әлеуметтік қорғау секторынан бастап Қазақстанда сәйкестендіру миссияларын іске қосуды ұсынады.
Шетелдік қонақтар AFD Қазақстанның денсаулық сақтау жүйесіндегі маңызды іргелі функциялардың бірін орындайтын оператор ретінде Бірыңғай дистрибьютордың қызметін қолдайтынын айтты.
Бірыңғай дистрибьютор басшысы Ерхат Искалиев, өз кезегінде, ынтымақтастыққа қызығушылық танытқаны үшін алғысын білдіріп, дәрілік заттар мен медициналық бұйымдарды орталықтандырылған сатып алу жүйесі, Қазақстанның инвестициялық мүмкіндіктері, бірлескен ынтымақтастықтың артықшылықтары және екі елдің одан әрі әріптестігінің перспективалары туралы толығырақ айтып берді.
Инвестициялар туралы айта отырып, қонақтардың назарына «Kazakh Invest»-пен бірлесіп әзірленген әлеуетті инвесторларға арналған Investment Guide Book нұсқаулығы ұсынылды.
Кездесу соңында тараптар қалыптасқан сындарлы диалог пен стратегиялық әріптестікті нығайтуға дайындығы үшін ризашылықтарын білдірді. Саланы дамытудың неғұрлым тиімді көрсеткіштеріне қол жеткізу мақсатында бірлескен күш-жігерді шоғырландыру қажеттігі атап өтілді.
Бірыңғай дистрибьютор өз тарапынан еліміздің фармацевтикалық секторын және тұтастай алғанда денсаулық сақтау саласын жақсарту және дамыту жөніндегі процесте туындайтын мәселелер бойынша ынтымақтастыққа және үйлестіруге жәрдемдесуге дайын.
Анықтамалық:
Францияның даму агенттігі (Француз тілінде: Agence française de développement, AFD) - 1941 жылы құрылған, дамушы елдердегі жобалар мен бағдарламаларды қаржыландыратын Франция үкіметінің агенттігі.
Франция Үкіметі белгілеген саясатты жүзеге асыратын мемлекеттік қаржы институты болып табылады. AFD командалары 150 елде 4200-ден астам жобаны жүзеге асырады.
Бұл мемлекеттік мекеме Африкада, Азияда, Таяу Шығыста, Латын Америкасында, Кариб теңізінде және Францияның шет елдерінде белсенді, онда ол халықтың өмір сүру жағдайларын жақсартатын, экономикалық өсуге ықпал ететін және планетаны қорғайтын жобаларды қаржыландырады және қолдайды.
