2025 жылғы 10 ақпанда Мемлекет басшысы Қасым-Жомарт Тоқаев «Қазақстан Республикасының кейбір заңнамалық актілеріне байланыс қызметтерін көрсету, мемлекеттік сатып алу, көлік және пошта мәселелері бойынша өзгерістер мен толықтырулар енгізу туралы» Қазақстан Республикасының Заңына қол қойды.
Құжат пошта, мемлекеттік қызметтер көрсету, сауда мақсатында теңізде жүзу саласындағы заңнаманы жетілдіруге, сондай-ақ мемлекеттің ақпараттық қауіпсіздігін арттыруға бағытталған. Түзетулер Қазақстан Республикасының екі кодексіне және жеті заңына енгізілді.
Негізгі өзгерістер ұлттық пошта операторының қызметіне қатысты. Жаңа заңға сәйкес «Қазпошта» АҚ денсаулық сақтау саласындағы заңнаманың талаптарына сәйкес дәрілік заттар мен медициналық бұйымдарды тасымалдау және сақтау құқығына ие болады.
Естеріңізге сала кетейік, 2024 жылдың желтоқсанында Ақмола облысында «СҚ-Фармация» ЖШС және «Қазпошта» АҚ медициналық бұйымдардың логистикасы бойынша бірлескен пилоттық жобасы басталды.
«Қазпошта»-мен ынтымақтастық логистикалық процестерді оңтайландыруға және медициналық бұйымдарды елдің кез келген өңірлеріне, соның ішінде шалғайдағы елді мекендерге уақтылы жеткізуді қамтамасыз етуге мүмкіндік береді.
Бұдан басқа, бұл «Қазпошта» технологияларының арқасында жүктерді нақты уақыт режимінде бақылауға мүмкіндік береді.
Бұл жоба ынтымақтастық туралы келісім және ақысыз қызмет көрсету шарты аясында жүзеге асырылады.
Бұған дейін «СҚ-Фармация» және «Қазпошта» басшылығы еліміздің медициналық ұйымдарына дәрі-дәрмектерді жеткізу жөніндегі жобаны іске асыруға дайын екендігін растады. Екі ұлттық оператордың ынтымақтастығы – медициналық логистиканы жақсартуға және өмірлік маңызды дәрі-дәрмектерді үздіксіз жеткізуді қамтамасыз етуге бағытталған қадам.
